我是阿Ken，求學時已接觸股票和賭波

最初只係當呢樣嘢係娛樂，到後期開始出嚟工作，有多餘錢都會少少咁去馬會投注下。之後以為自己認識多咗金融市場就開始經常玩股票，起初喺股票上都有贏錢但最終都係輸。後期都有同朋友搞D小生意，但當然最終都係搞唔掂，而當時已經開始向銀行借貸。

 以前一直以來都覺得自己可以搞掂冇同任何人講過，到後尾慢慢越滾越大，由最初向銀行財務公司借到後期身邊嘅人。當時只係喺度諗究竟有咩方法可以快啲搵多啲錢就去返股票/馬會投注諗住贏咗可以用嚟還錢，但當然都係會輸番晒。

 後期屋企人發現我有借、賭錢就叫我去搵專業人士求助。過咗一段時間已經冇再用呢啲捷徑去諗點樣還錢，但一直沒有向家人坦白所有借貸，每次都有隱瞞但我一次又一次咁令到屋企人傷心、失望。最終件事去到最差嘅地步爆煲之後先將所有野同屋企人講晒。

 自己以前一直唔敢面對同坦白先搞到而家咁嘅情況，但屋企人親戚直到呢一刻都仲支持幫我改過。好多嘢發生咗冇得返轉頭，只可以後悔點解當初冇同屋企人親戚傾吓件事同坦白，聽多啲唔同人嘅意見點都好過自己一個去諗點解決，而家只希望重新開始慢慢將自己一手破壞嘅關係修補。金錢朋友冇咗可以再搵過，親人就冇可能再搵過，多啲同身邊嘅人傾吓煩惱緊嘅事，後悔嘅事情用嚟借鑒不要讓事情變成遺憾。