18歲生日即過大海

我叫Marco, 3歲開始打麻雀，十幾歲已經賭馬賭波，18歲生日第一時間係去澳門。曾經以為賭係我生命不可或缺的一部分，一直都好鐘意賭嘅刺激感同帶俾我滿足感。既可消磨時間又可從而得到放鬆，就咁睇完全無問題。但直到跟住越買越大再到第一次爆煲，嗰種感覺已經唔係我想像中咁樣。

 爆煲後因為仍然唔服輸，所以同屋企人同愛嘅人講大話報細數，希望靠自己追返再去借，理所當然地再有第二次爆煲。第二次後就上左黎青亮，希望幫到自己。呢次就相對有決心，不過都係維持左兩個月，又再復賭，今次連中心姑娘都幫我同佢講大話…好自然就有第三次爆煲真到依家。

諗番起爆煲後又復賭又爆，其實嗰段時間，賭帶俾我嘅野已經唔係任何刺激定娛樂，只係一個唔服輸嘅心態，一個無意義嘅心態，因為只會越踩越深。

仲記得開始借錢賭後嘅心理壓力，真係依家都唔想再諗番起…每次借錢嚟賭，好彩的話中左，就夠還聽日條數，但唔代表後日又搞得掂。到後日輸左，凌晨就開始望下WhatsApp, 睇下有邊個朋友可以頂住先，然後去跑返條數返黎有一二線財務，連電話數又有，所以不論嗰種唔想輸嘅壓力或者開口問人借嘅壓力都真係好難。又要怕財務公司唔借，還唔到俾朋友，然而呢d野係每日都發生緊，所以真係一秒都唔想諗起。

 #戒賭後漸見曙光

到依家終於放低左唔服輸的決心，多左時間做自己野，例如做運動啦、睇片啦、 同家人行山等等。壓力絕對細左，雖然只係半年左右，絕對未係成功，不過眼見青亮有好多成功例子，相信我自己都一定得。當然仲有好長嘅路要行，債務都係一個緊要問題，二三線財務順利傾好每月還款。當然中間過程經歷不停俾人騷擾自己家人持續成個月，都好多謝屋企人都無怨言，都支持我，同埋都好彩暫時仲保得份工，起碼仲見到曙光！

最後再諗返，其實賭係可以係我生命缺失的。